(1879) Cantares en dialecto asturiano, cuyos autores se ignoran
Diz que los tos pañuelinos
y les tos sayes floriades,
costaron solo besinos
y tenrures y mirades;
pos oye; si ye verdá,
da cuando te pasará.
Ay Maruxina
la barriga duelte
por so les faldes
coxiste la muerte.
Mexelles rosades,
güeyos gayasperos
caderes torniades,
meneos arteros
á los de mal xuiciu
los saquen de quiciu.
Saliste de casa
frescu y colorau
non buelbas á ella
flacu y rebalgau.
El que tien la muyer guapa
cabo cas de los señores
tien mas trabayu con ella
que cabar y fer borrones.
El que non tien gües nin carru
nin tampocu tien muyer
nin unce cuando i da gana
nin se fuelga cuando quier.
E nos tos calzones
mas que en palombar
añeren pichones
dempués de plumar.
Co la fabaraca
y agua de la fuente
faise mala casa
y quexase el diente.
Tos güeyos requieren güeyos;
to corazon corazones;
los pliegues de la to saya
requieren los mios calzones.
Munchu te metes pol cura;
tengamos la fiesta en paz;
non sea que algun rapaz
ponga fin á to folgura.
Sol de casa non calienta
por eso la to muyer
que sabe echar bien so cuenta
á utru pradu ba á pacer
callentina y alloriada,
fasta ganar la cebada.
Está bono Maruxina;
ñunca vas á les misiones
y siempre a les esfoyaces
ye que desde bien aína
munchu mas que los sermones
quies la fuelga y los rapaces.
Traen consigo neñinos...
Si quies ponete caliente,
arrimate bien a Xuana
ó echa un tragu d'aguardiente.
¿Monxa tu? como mió güela,
quies folgala y bon sustentu
la xira y la parpayuela
y eso non lo da el combentu.